കൊറോണ വൈറസ് നമ്മുടെ ജീവിതത്തിൽ വരുത്തിയ മാറ്റങ്ങൾ ചെറുതൊന്നുമല്ല. പല മേഖലകളെയും ഈ വൈറസ് സാരമായി തന്നെ ബാധിച്ചു. അതിൽപ്പെട്ട ഒന്നാണ് വിദ്യാഭ്യാസ മേഖല. ഇത് സ്കൂൾ കാലമാണെങ്കിലും കൊറോണ കാരണം കുട്ടികൾക്ക് സ്കൂളിൽ പോകാൻ സാധിക്കുന്നില്ല. അതിന് ഒരു മാർഗ്ഗമെന്നോണം ലോകത്തിൻ്റെ വിവിധയിടങ്ങളിലെല്ലാം ഇപ്പോൾ ഓൺലൈൻ വിദ്യാഭ്യാസ രീതിയാണ് പിന്തുടരുന്നത്.
ടാബ്‌ലെറ്റുകൾ, സ്മാർട്ട്‌ഫോണുകൾ അല്ലെങ്കിൽ ലാപ്‌ടോപ്പുകൾ എന്നിവയാണ് ഇപ്പോൾ കുട്ടികളുടെ പുതിയ ക്ലാസ്സ്റൂമുകൾ. ഈ ഇലക്ട്രോണിക്സ് ഉപകരണങ്ങളുടെയെല്ലാം സ്‌ക്രീനിൽ, അവരുടെ അധ്യാപകരും സമപ്രായക്കാരും തത്സമയം അവരെ സ്വാഗതം ചെയ്യുന്നു, മിക്കവാറും മുഖാമുഖം എന്നപോലെ. കുട്ടികൾ അവരുടെ സഹപാഠികളുമായി തത്സമയ ചർച്ചകളിൽ ഏർപ്പെടുകയും, അസൈൻമെന്റുകൾ സമർപ്പിക്കുകയും, പാഠ്യേതര പ്രവർത്തനങ്ങളിൽ പങ്കെടുക്കുകയും ചെയ്യുന്നു. ഇപ്പോഴത്തെ ഈ പുതിയ വിദ്യാഭ്യാസ രീതി വിർച്വൽ സ്കൂൾ എന്ന ഓമനപ്പേരിൽ അറിയപ്പെടുന്നു.
എന്താണ് ഒരു വിർച്വൽ സ്കൂൾ?
ആധുനിക സ്കൂളിന്റെ പുതിയ അവതാരങ്ങളാണ് വിർച്വൽ സ്കൂളുകൾ. വിർച്വൽ സ്കൂളുകളിൽ, സ്കൂളിന് പുറത്തുള്ള ഏത് സ്ഥലത്തുനിന്നും വീഡിയോ കോൺഫറൻസിംഗ് പോലുള്ള ഓൺലൈൻ ഉപകരണങ്ങളിലൂടെ വിദ്യാർത്ഥികൾ പഠന യാത്രയിൽ അധ്യാപകനോടൊപ്പം ചേരുന്നു. ക്ലാസുകൾ തത്സമയം നടക്കുന്നു, കൂടാതെ ഒരു സാധാരണ സ്കൂളിലെന്നപോലെ വിർച്വൽ പാഠത്തിനിടയിലും വിദ്യാർത്ഥികൾ ഹാജരാകണം.
വിർച്വൽ സ്കൂളുകളെക്കുറിച്ച് ഓർമ്മിക്കേണ്ട കാര്യങ്ങൾ
*വിർച്വൽ സ്കൂളുകൾ സംവേദനാത്മകവും ടു-വേ ടീച്ചിംഗ് മോഡുമാണ്.
*വിർച്വൽ സ്കൂളുകൾ തത്സമയം പ്രവർത്തിക്കുകയും, മുഴുവൻ കുട്ടികളും ഒരേ സമയം വിർച്വൽ ക്ലാസ് റൂമിലേക്ക് ലോഗിൻ ചെയ്യുകയും, അധ്യാപകനിൽ നിന്ന് പാഠം ഉൾക്കൊള്ളുകയും ചെയ്യുന്നു.
*വിർച്വൽ സ്കൂളുകൾ ലളിതമായ സാങ്കേതികവിദ്യയെ ആശ്രയിക്കുന്നു. അധ്യാപകർക്കും വിദ്യാർത്ഥികൾക്കും സ്മാർട്ട് ഉപകരണവും, വൈഫൈ കണക്ഷനും ഉപയോഗിച്ച് ഒരു വിർച്വൽ ക്ലാസ്റൂം സൃഷ്ടിക്കാൻ കഴിയും.
വെർച്വൽ സ്കൂളുകളുടെ പ്രയോജനങ്ങൾ
1.വിർച്വൽ പഠനം വിദൂരമായി പഠിക്കാൻ അനുവദിക്കുന്നു- വിദൂരമായി പഠിക്കാനും, സ്കൂളിൽ ചേരാനുമുള്ള സൗകര്യവും പ്രദാനം ചെയ്യുന്നതിനാൽ ഉന്നത വിദ്യാഭ്യാസ രംഗത്ത് വളരെ സാധാരണമായ വിർച്വൽ ലേണിംഗ് ഇപ്പോൾ സ്കൂളുകളിൽ കൂടുതൽ പ്രചാരം നേടുന്നു. എല്ലാത്തരം ഒത്തുചേരലുകളും നിർത്തിയ COVID-19 മൂലം സംഭവങ്ങൾ നാടകീയമായി മാറിയപ്പോൾ, ആധുനിക സ്കൂളുകൾ തൽക്ഷണം വിർച്വൽ സ്കൂളുകളിലേക്ക് മാറി, വിദ്യാർത്ഥികൾക്ക് അവരുടെ വീടുകളുടെ സുഖസൗകര്യങ്ങളിൽ നിന്ന് തന്നെ വിദൂരമായി ക്ലാസുകളിൽ പഠിക്കാൻ സാധിച്ചു.
2.ടു-വേ പഠനത്തെ അനുവദിക്കുന്നു- അധ്യാപകനും വിദ്യാർത്ഥിയും തമ്മിലുള്ള ദ്വിമുഖ ആശയവിനിമയമാക്കി വിർച്വൽ സ്കൂളുകൾ ഇ-ലേണിംഗ് അനുഭവങ്ങളെ മറ്റൊരു തലത്തിലേക്ക് കൊണ്ടുപോകുന്നു. അധ്യാപനത്തിന്റെയും പഠനത്തിന്റെയും ഒരു സംവേദനാത്മക രീതി കൂടിയാണിത്.
3.വിർച്വൽ സ്കൂളുകളിലൂടെയുള്ള പഠനം വിദ്യാർത്ഥികൾക്ക് ആയാസം നൽകുന്നു- ഇത് പരീക്ഷയെ സമീപിക്കാൻ തയ്യാറെടുക്കുന്ന സീനിയർ ഗ്രേഡ് വിദ്യാർത്ഥികൾക്ക് പ്രത്യേകിച്ചും പ്രയോജനകരമാണ്. മറ്റൊരു വിഷയം പഠിക്കുന്ന തിരക്കിലായിരിക്കുമ്പോൾ അവർക്ക് ക്ലാസ്സ് റെക്കോർഡ് ചെയ്ത് പിന്നീട് പഠിക്കാവുന്നതാണ്.
4.വർദ്ധിച്ച രക്ഷാകർതൃ പങ്കാളിത്തം -വിർച്വൽ ക്ലാസ്സുകളായതിനാൽ രക്ഷിതാക്കൾക്ക് കുട്ടികളുടെ പഠനത്തിൽ കൂടുതൽ ശ്രദ്ധിക്കാൻ സാധിക്കുന്നു. കൂടാതെ പഠനത്തിലെ വെല്ലുവിളികളെ അതിജീവിക്കാൻ കുട്ടികളെ സഹായിക്കാനും രക്ഷിതാക്കൾക്ക് സാധിക്കുന്നു.
മാറുന്ന രീതികൾക്കൊപ്പം സഞ്ചരിക്ക എന്നല്ലാതെ മറ്റൊന്നിനും ഈ കൊറോണക്കാലത്ത് നമുക്ക് സാധിക്കില്ല. അതിൻ്റെ ഭാഗമായുള്ള ഈ വിർച്വൽ സ്കൂൾ നമ്മുടെ കുട്ടികളിൽ നല്ലത് വരുത്തട്ടെ.